利迷主場:Champs Bar (已於19/20球季告別)

A12 接獲 Champs Bar 正式通知,由於轉變營運模式及營業時間,故此未能繼續與 A12 合作安排睇波活動。

作為球迷會,Anfield’s 12th與香港及世界各地利迷一齊觀賞利記比賽及支持球隊是不可或缺。創會初期我地東奔西跑到唔同酒吧或場所為利記打氣。自2008年起我地多數以Champs Bar為聚腳地,凝聚一班利迷風雨不改支持愛隊,及後更與酒吧合作,正式成為我地A12主場,輾轉間接近十個寒暑。Champs Bar內充滿利物浦主題佈置,令利迷更有歸屬感,尤如置身利市一樣。漸漸地世界各地利迷亦慕名而來,令來自五湖四海利迷一家親,我地非常慶幸認識到唔同嘅利迷朋友,亦與唔同國家嘅OLSC加強交流,令紅軍家庭日漸擴大。

Champs Bar環境闊落,適合三五知己或一家大細一齊支持愛隊,每逢比賽日必定氣氛高漲,大戰更加熱血沸騰。利迷載歌載舞,盡情享受比賽。

Champs Bar作為我地主場,亦好榮幸於2017年LFC World訪港活動中,成為官方特選睇波場地,當晚幾位利迷名宿親臨同大家講波經分享職業生涯點滴,並一齊欣賞利記比賽,絕對係我地香港利迷難忘嘅一夜。